«انت بتغلط وواجب علينا مساندتك».. شوبير يوجه رسائل نارية لـ حسام حسن

وجه الإعلامي أحمد شوبير، رسائل نارية إلى حسام حسن، بعد توليه تدريب منتخب مصر في الفترة المقبلة خلفًا للبرتغالي روي فيتوريا، الذي أُقيل بسبب سوء النتائج.

وقال أحمد شوبير، في تصريحات تلفزيونية عبر فضائية أون تايم سبورتس«:»أنا هكون واضح جدًا، حسام حسن عنده أخطاء؟ أكيد وهو حسام، مبيحبش حد يقوله انت بتغلط دي مشكلته أنه مقتنع أنه مبيغلطش، لأ إنت بتغلط لكن أنت دلوقتي في مرحلة تانية خالص أنت مدرب منتخب مصر وإبراهيم حسن، أنت مدير منتخب مصر«.

وأضاف: «في صفحة ترموها انتوا الاتنين ورا ضهركم وتبدأوا صفحة جديدة ليكوا انتوا، إذا كنتوا عاوزين تكملوا في الكارير ده ارموا الصفحات القديمة اللي فيها أخطاء ورا ضهركم وتتعاملوا إن أنتوا بتقودوا منتخب مصر أم الدنيا لازم تبقوا عارفين ده».

وأكمل: «هناك مفيش رحمة في العقوبات عندنا الخواطر كتيرة ولكن الغلطة بره بفورة مفيهاش هزار الشطارة انك تعيد حساباتك من أولها لأخرها وعدم التعصب على اللاعبين لأن النادي حاجة والمنتخب حاجة أنا بتكلم بوضوح شديد جدًا، انت بتتعامل في المنتخب مع (أطخن ناس في الكورة)».

وواصل: «طريق التعامل في غرف الملابس والمباريات لازم تتغير، كلمة صادقة لازم تتقال لأننا داخلين على مرحلة جديدة».

وأردف أحمد شوبير: «حسام حسن، قادر أنه يكرر تجربة محمود الجوهري، مهم جدًا أن يكون المدرب نجم خاصة إذا كان مدرب جيد»، مضيفًا: «محدش هيكلمك بصراحة زيي كده يا كابتن حسام، أنا أعلم بشدة إنك بتغضب مني بعنف لكن حقك عليا إني أساندك وأصارحك».

وأتم: «وجب علينا المساندة والمؤازرة والتشجيع ولما تغلط نقولك انت غلطان محدش مبيغلطش أبوك الروحي الكابتن الجوهري، كان بيغلط كلنا بنغلط بس الأهم إني أساندك».