حمو بيكا: نفسي أرجع لحياتي القديمة.. والراب مبقاش موجود دلوقتي عكس المهرجانات
تحدث الفنان حمو بيكا عن تفاصيل حياته المهنية قبل دخوله عالم المهرجانات الغنائية، مشيرا إلى انه عمل في كافة المجالات، حيث انه كان يشعر بالراحة النفسية قبل دخول الوسط الفني
وقال «بيكا» خلال استضافته مع الإعلامي هيثم بسّام في برنامج ورقة في ملف على شاشة قناة النهار: «مفيش حاجة مشتغلتهاش وكانت فترة جميلة وكنت في أسعد حياتي وبنام مطمن ومرتاح، وأتمنى أرجع لحياتي القديمة طبعًا، أنا شيلت مسئولية كبيرة، وكان في الأول فيه والدي ربنا يخليه ليا موفر لنا كل حاجة»
وأضاف:«كل بتوع الراب أخواتنا، وهما مقطعوش عينا، هو مش موجود حاليًا والمهرجان اللي موجود، دلوقتي عصام صاصا أي أغنية بينزلها لازم تتصدر التريند، فين ويجز دلوقتي؟ هو منزلش حاجة، هو ويجز حلو وابن بلدي وبيمثلنا برا وحاجة كبير، بس مش بينزل دلوقتي».
وأردف حمو بيكا: «أنا لما بدأت الغنا مكنش فيه غيري في الساحة، وعملت اللي نفسي فيه كله، ولما يطلع عصام صاصا أفرحله وليه أحقد عليه؟ نشجع بعضنا كمان، فيه ناس مبتحبش كده».
ورد حمو بيكا على منتقدي المهرجانات الشعبية واتهام البعض بأنها أفسدت الذوق العام، قائلًا: «هنخرب البلد ليه؟ إيه عملناه خربنا البلد؟ إحنا معملناش حاجة، أنا دخلت في فنادق عالية وغنيت لأمراء، وأنا معايا فرقة مكونة من 20 نفر أعضاء عاملين كلهم، ويمكن ربنا بيديني عشان الناس ديه».
