كرهنا الحقيقة.. شعر لــ عيد حميدة
كرهنا الحقيقة
عشان الحقيقة
بقت شىء محال
وأصبحنا نهرب
يوميات وليلاتى
ولو للخيال
بقينا بنعشق
سواد الحياة
ولو حتى نعشق
نخاف الوداع
وحتى لو إحنا
فى يوم اتقابلنا
نخاف الضياع
وشفنا النجوم
اللى قايدة ف سمانا
تنور حياتنا
وخايفة فى لحظة
هجوم الشعاع
ولما السفينة
بتنسى ف بحورنا
وترتاح للحظة
تلاقى الصراع
يحطم قلوعها
ويهجم بقسوة
ويرمى الشراع
ولو جينا نفرح
هنصبح ضحايا
ولو مرة نوصل
لخط النهاية.
نخاف مرة تانية
عشان البداية
ولما اكتشفنا
الحقيقة الجديدة
بقينا بنكره
أصول الحكاية
وتاهت سككنا
وغاب اللى فاكر
بإنه ف لحظة
هيصبح شجاع.
اكتشاف المزيد من شبكة الريان
اشترك للحصول على أحدث التدوينات المرسلة إلى بريدك الإلكتروني.
