«لازم تبقى موجود لو برجل واحدة».. أحمد حسن يفتح النار على محمد صلاح
علق أحمد حسن، قائد منتخب مصر السابق، على قرار عودة محمد صلاح، قائد منتخب مصر ونجم نادي ليفربول الإنجليزي، إلى ناديه لاستكمال علاجه من الإصابة في العضلة الخلفية.
وأعلن اتحاد الكرة عودة محمد صلاح، لإنجلترا عقب مباراة كاب فيردي، اليوم الإثنين، لاستكمال علاجه، على أمل لحاقه بالمنتخب في الدور قبل النهائي لبطولة كأس الأمم الأفريقية في حالة التأهل.
وقال أحمد حسن، في تصريحات تلفزيونية عبر فضائية «دي إم سي»: «أنا كنت من أكثر المدافعين عن محمد صلاح، اتكلمت وقولت مش ضد النقد من حقك أن تنتقد محمد صلاح، فنيًا، وإنما متدخلش في نواياه ولا تشكك في وطنيته».
وأضاف: «سعدت جدًا بعد علمت أن صلاح، سيتواجد في المؤتمر الصحفي لمباراة الرأس الأخضر، خاصة أنه قلما ما يظهر في المؤتمرات الصحفية، وأكدت أن تواجده في المؤتمر شيء إيجابي لكي يرفع من معنويات اللاعبين ويوجه رسائل إلى الجمهور المصري بأن اللاعبين يقدرون غضبهم ويشعرون بالمسؤولية».
وتابع: «صلاح، مش لاعب عادي، ده كابتن المنتخب يعني زيه زي المدير الفني، أنا لما هتكلم دلوقتي مش هتكلم بصفتي مقدم برامج وإنما بصفتي كابتن للمنتخب لجيل حقق الثلاثية وجيل ذهبي وكنت موجود مع جيل به كباتن كبار تعلمت منهم ازاي تكون قائد والشخصية القيادية، الكابتن دوره مش في الملعب بس دوره خارج الملعب أكتر من جوه الملعب».
وواصل: «احنا معانا جهاز طبي ولا مش معانا؟! أنا شايف إن الشد في الخلفية من خلال تجربتي ممكن ياخد أسبوع أو 10 أيام علاج».
وتسائل أحمد حسن،: «هل اللوائح بتقول إن لاعب يسيب المنتخب ويرحل ويعود مرة أخرى؟ زي ما بنقف مع نجومنا وبندعمهم وقت الغلط لازم نقولهم انتوا غلط. نصير مزراوي، لاعب منتخب المغرب ونادي بايرن ميونخ الألماني تعرض للإصابة قبل البطولة وهذه الإصابة قد تبعده عن الملاعب لمدة 3 أسابيع، نادي بايرن ميونخ طلب عودته، ولكن وليد الركراكي، مدرب المغرب تمسك بتواجده مع المنتخب واللاعب تمسك بالتواجد مع منتخب بلاده، بايرن ميونخ لم يجد أمامه سوى إرسال أحد أفراد الطاقم الطبي للاطمئنان على اللاعب ومتابعة حالته».
وأكمل: «لو صلاح، يرغب في الاستمرار مع المنتخب، نادي ليفربول يرسل له أحد أفراد الجهاز الطبي. أنا عندي عتاب على صلاح، إنت قائد للفريق إنت كابتن المنتخب، لازم تكون موجود في الوقت الصعب مش في الوقت السهل، الوقت ده وقت صعب وانتوا اللي حطتونا في الموقف ده، لازم تبقى موجود لو برجل واحدة».
واسترسل: «أنا مش فاهم اتحاد الكرة فين من اللي بيحصل، رسائل صلاح في المؤتمر الصحفي إن ده مش منتخب صلاح، ودي حقيقة ده مش منتخب صلاح، ده منتخب مصر صاحب أكبر عدد بطولات وصاحب الإنجازات التاريخية في البطولات الإفريقية، هو كان بيقول كده لأنه سيرحل»، مضيفًا: «كلام صلاح، كلام جيد وكلام ممتاز وإنما احنا عاوزين فعل مش عاوزين كلام، اه احنا عندنا لاعيبة كويسك وهنقاتل ولكن اللعيبة محتاجة إنك تقاتل معاهم وتكون موجود لأنك القائد، في وقت من الأوقات تم نزع الشارة من أحمد فتحي، لكي تحصل عليها، وأنا كنت ضد هذا القرار»
وأردف: «أنا كنت أكثر المدافعين عن محمد صلاح، لأنه اسم كبير ولاعب أسطوري ولكن اللي بيحصل ده أنا مستغربه جدًا، أنا كنت موجود مع المنتخب وكان معانا لعيبة بتموت وبتقول مش هنسيب المنتخب لأن الوقت ده المنتخب محتاج القائد بتاعه يبقى موجود»، مضيفًا: «عندنا ثقة في كل اللعيبة، هتمشي بأي حد».
وأشار: «ليفربول بيقول لو منتخب مصر وصل للنهائي صلاح هيبقى موجود، طيب الناس اللي قاتلت وصلت للنهائي هتبقى محتاجة إيه من صلاح»
وأتم: «كنت مبسوط جدًا لما شوفت المؤتمر، وعجبني كلام صلاح، ولكن التطورات اللي حصلت خلتني حزين، حزين على حالنا وحزين على حال اسم منتخب مصر، لأن اسم منتخب مصر أكبر من أي حد، الأجيال بتتغير والنجوم بتتغير ويبقى اسم مصر قبل كل شئ، أتمنى أن يكون هناك مراجعة».
