عبدالمنصف: «إيه المشكلة في مباراة الـ 6/ 1؟.. وليه محدش بيتكلم عن خماسيات الشناوي»

قال محمد عبدالمنصف، حارس مرمى الزمالك ومنتخب مصر السابق، أنه لم يحصل على حقه خلال مشواره الكروي بسبب مباراة الأهلي والزمالك والتي انتهت بفوز الفريق الأحمر بنتيجة 6/1.

وقال محمد عبدالمنصف، في تصريحات تلفزيونية عبر فضائية «دي إم سي»: «حصلت على 17 بطولة مختلفة مع الزمالك ومنتخب مصر وعملت أرقام جيدة في اللعب على المستوى المحلي والدولي، حيث لعبت 26 موسم متتالي وتخطيت ريان جيجز وتوتي ومالديني وكسبت ماتشات أهلي وزمالك وحققت نتائج جيدة مع أندية صغيرة، وكل ده مبيتشافش وحاجة واحدة بتتصدر للناس وهي مباراة الـ 6/1 رغم أن النتيجة عادية، وارد الفرقة تكون مش في يومها ووارد انت تكون مش يومك، رغم أن دي من المباريات اللي لعبتها كويس».

وأضاف: «طول الوقت متصدر للناس ماتش الـ 6/1 إيه المشكلة؟ ليه محدش بيتكلم عن خماسيات الشناوي اللي شالهم من صن داونز، ما عصام الحضري، اتغلب أمام السعودية في كأس القارات، هذا ليس تقليلًا من الحراس، البرازيل خسرت من ألمانيا 7 / 1 في كأس العالم».

وتابع: «ليه مش بتشوفوا المباريات الكويسة اللي أنا لعبتها والإنجازات إلى حققتها، ليه بتشوفوا من منظور ده بتاع الـ 6/1؟».

وأتم «مباراة الـ6/1 من المباريات الجيدة التي لعبتها لأني تصديت لانفرادات أكثر من الأهداف التي دخلت».