«مدرب أبيض».. إسلام الشاطر يفتح النار على أيمن عبد العزيز

فتح إسلام الشاطر، نجم الأهلي السابق، النار على أيمن عبدالعزيز، مدرب منتخب مصر السابق.

وقال الشاطر، في تصريحات تلفزيونية عبر قناة «الأهلي»: «اكتشفت امبارح إن كان عندنا مدرب عام في منتخب مصر هو مدرب أبيض، عاوز تفسر أبيض زي ما أنت عاوز فسرها ممكن يكون أبيض الهوى أو محب للون الأبيض».

وأضاف: «تخيل إن مدرب في منتخب مصر بيقول مفيش حاجة اسمها تكتك وخطة والحاجات دي نسبتها لا تتخطى 10%! ده كلام أيمن عبدالعزيز، خلال حواره في أحد البرامج التلفزيونية».

وتابع: «بعد تصريحات أيمن عبدالعزيز، قولت الحمدالله منتخب مصر مخرجش بفضيحة».

وواصل: «أيمن عبدالعزيز، بيتكلم إنه تم مهاجمته عشان هو زملكاوي، مدرب ممشيها أهلاوي وزملكاوي مدرب عامل انقسامات بين اللاعبين وبيقول مدربين الزمالك بيتهاجموا من الإعلام على عكس مدربين الأهلي محدش هاجم شيتوس ومحدش هاجم محمد شوقي، بقى ده اسمه كلام بدل ما تطلع تحتوي غضب الجماهير اللي زعلانة من الفضيحة اللي حصلت إنت بتزيد الطين بلة».

وأكمل: «طالع تزود الانقسامات وبتحاول تضرب بين الناديين الكبيرين الأهلي والزمالك، اختلافات في الرأي انت حر، ولكن توصل لدرجة إنك تقول مفيش حاجة اسمها خطة وتقول إنك اتعرضت للهجوم عشان زملكاوي، عيب يا كابتن أيمن، لما تطلع بهذا الشكل وتتكلم بهذا المنطق».

وأردف: «أيمن عبدالعزيز، قبل انضمامه للجهاز الفني للمنتخب كان بيغلط في كل لاعبي الأهلي على الهواء مباشرة والموضوع عدى وكمل في المنتخب عشان في الاتحاد عاوزينه، لكن توصل بدل ما تستخبى وتطلع تهدي الجماهير تعمل انقسامات»

وأتم: «هو أنت كنت بتتكلم مع محمد صلاح وتريزيجيه ومرموش ومصطفى محمد، تقولهم الكلام ده! إحنا عشان كدة خرجنا من دور الـ16».